|
Rezumu konteúdu |
Sérgio Filomeno Marques, ne’ebé ema bolu mós “Amali”, iha parte liman-loos husi fotografia. Nia hamutuk ho manifestante sira-seluk ne’ebé polísia foin kaer liutiha Masakre Santa Cruz. Max Stahl filma tiha “Amali” durante masakre ne’e, bainhira nia tulun manifestante ida, Levi Corte-Real, ne’ebé hetan kanek todan. Tinan ruanulu liutiha masakre, autoridade sira halo estátua ida tuir imajen ne’e no tau iha Igreja Motael nia oin.
Liutiha tiru hasoru ema iha dalan, manifestante sira halai ba semitériu. Soldadu indonéziu sira sei hale’u semitériu. Parese sira-nia operasaun planeia tiha hodi hadadur ka oho ema hotu ne’ebé partisipa iha manifestasaun. Maioria husi ema ne’ebé soldadu kaer ona sei lori ba estasaun-polísia (“polres”) iha Komoro, Dili. Iha ne’ebá, ema indonéziu husu-litik manifestante sira, baku sira no obriga sira atu la’o iha fatin ho ai-tarak. Sobrevivente ida hatudu ba Max Stahl kanek sira ne’ebé nia hetan iha ninia ain. Hafoin ida-ne’e, maioria manifestante sira liberta tiha. Tuir sasin-na’in sira, ema na’in rua ka tolu karik baku mate. Iha dúvida ruma kona-ba saida mak akontese ba ema seluk ne’ebé militár sira kaer tiha. Dr. Andrew McNaughton halo entrevista ho Bispu Carlos Belo iha tinan 1995. Bispu konta ba nia saida maka Timór-oan sira ne’ebé serbisu hamutuk ho “intelijen” hatete ba Ambispu. Tuir ema ida ne’ebé partisipa iha hahalok ne’e: “Militár tau manifestante iha karón sira ne’ebé sira futu-metin. Manifestante sira bolu Apa Jezús Maria. Militár haruka ami atu fó-tiru hasoru sira." |
/ 121 
