|
Rezumu konteúdu |
Halo muzeu ne’ebé moris nafatin iha ai-laran: Komandante Falur Rate Laek no gerrilleiru sira FALINTIL nian iha ninia komandu nia okos iha baze movel ida [baze ne’ebé bele muda bá-mai] besik baze nafatin Indonézia nian no besik liu Komandante nia uma-kain. Baze ne’e gerrilleiru sira hanaran "Alarma” [alarme ka tuhin]. Filme badak ne’e halo tiha atu uza ho telemovel. Horiuluk, Komandante Falur lidera funu iha área ne’e. Nia esplika oinsá gerrilleiru sira uza baze ne’e. Veteranu sira konta kona-ba sira-nia esperiénsia bainhira sira funu hasoru Indonézia “iha inimigu nia kabun laran".
Abrigu “Alarma” hetan ninia naran hafoin insidente ida ho megafone [aparellu ida atu ko’alia maka’as liu ka atu fó sinál-alarme] ne’ebé Komandante Falur la hatene oinsá tenke uza. Abrigu ne’e parte husi rede ida baze movel sira ka abrigu sira ne’ebé guerrileiru sira uza dala ruma durante semana balu hodi ko’alia ho malu; no fó-hatene sira-nia planu ba Klandestina ne’ebé suporta sira;no liuhosi Klandestina ho komunidade ne’ebé hela iha Indonézia nia okos no ho sira-nia elementu “intelijen” ne’ebé serbisu iha komandu militár Indonézia nia laran.
Liutiha independénsia, komunidade ne’ebé suporta funu guerrilla nian ne’ebé Jenerál Falur Rate Laek no maluk seluk [inklui mós Taur Matan Ruak no Lu Olo ne’ebé sai Prezidente tuirfalimai] lidera iha rejiaun ne’e prepara dalan, odan no varanda ruma. Ho meius hirak ne’e, posivel no fasil atu ba to’o "Baze sira husi Komandu Gerrilla nian". Filme badak ne’e halo tiha atu uza ho App ba telemovel sira bainhira ema vizita fatin baze sira-nian. Filme ne’a hatudu oinsá Rezisténsia moris no luta iha tempu liubá, bainhira "estafeta” sira [ema ne’ebé lori hodi entrega lia-tatoli] sa’e ba foho no imita manu-fuik sira ka uza kódigu ruma atu fó-hatene gerrilleiru sira iha baze katak sira mai ona. |
/ 121 
